Skip to content

May 10, 2019

ពិធីបុណ្យចូលឆ្នាំខ្មែរ ២០១៩

by NEY SOKRA

អត្ថបទខ្លី រៀបរៀងដោយ ៖ សិស្សានុសិស្សថ្នាក់ 4ème ថ្នាក់ភាសាខ្មែរ ឆ្នាំសិក្សា ២០១៨-២០១៩

នាថ្ងៃសុក្រ ៨កើត ខែចេត្រ ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី១២ ខែមេសា ឆ្នាំ២០១៩ ចាប់ពីម៉ោង ១២ ថ្ងៃត្រង់ រហូតដល់ម៉ោង ១៦ ល្ងាច សិស្សានុសិស្សថ្នាក់មធ្យមសិក្សាដែលរៀនភាសាខ្មែរនៅវិទ្យាល័យបារាំងរ៉ឺណេដេកាត បានរួមគ្នារៀបចំប្រារព្ធពិធីបុណ្យចូលឆ្នាំខែ្មរ ក្រោមការគ្រប់គ្រងរបស់លោកគ្រូភាសាខ្មែរខាងមធ្យមសិក្សា គឺលោកគ្រូ សេង ផលអ៊ី លោកគ្រូ ណី សុក្រា និងលោកគ្រូព្រំ ចាន់ណា។ ពិធីអបអរសាទរបុណ្យចូលឆ្នាំខ្មែរខាងលើនេះ ត្រូវបានចូលរួមពីគ្រប់សិស្សានុសិស្ស បុគ្គលិក និងគណៈគ្រប់គ្រងទាំងអស់នៃវិទ្យាល័យបារាំងរ៉ឺណេដេកាត។ នៅក្នុងពិធីបុណ្យនេះមានល្បែងប្រជាប្រិយខ្មែរ ដូចជា ៖ បោះអង្គុញ ចោលឈូង  លាក់កន្សែង លោតបាវ ទាញព្រ័ត្រ ។ល។ ព្រមទាំងមានការលក់អាហារ និងបងែ្អមខែ្មរ រៀបចំដោយក្រុមសិស្សានុសិស្សថ្នាក់ភាសាខ្មែរ ដែលមានដូចជា នំបញ្ជុកសម្លការ៉ី សម្លខ្មែរ ទឹកកកឈូស បង្អែមបាយដំណើបស្វាយ និងភេសជ្ជៈផ្សេងៗទៀត។ មិនតែប៉ុណ្ណោះមានសកម្មភាពនានាដូចជាការសម្ដែង រាំ ច្រៀង ការថតរូប ការស្លៀកសម្លៀកបំពាក់ខ្មែរ ការធ្វើបទបង្ហាញស្ដីពីពិធីបុណ្យចូលឆ្នាំខ្មែរ ជាដើម។

សួស្ដីឆ្នាំថ្មី ឆ្នាំ កុរ ឯកស័ក

ខ្ញុំគិតថានាឆ្នាំនេះ ក៏ដូចឆ្នាំមុនដែរ គឺមានសិស្សានុសសិស្សពីគ្រប់ថ្នាក់ ព្រមទាំងបុគ្គលិកវិទ្យាល័យបារាំងរ៉ឺណេដេកាតទាំងអស់បានមកចូលរួមលេងល្បែងប្រជាប្រិយ ញ៉ាំអាហារ និងបង្អែមខ្មែរ និងចូលរួមស្វែងយល់ពីវប្បធម៌ និងទំនៀមទំលាប់ខ្មែរយ៉ាងសប្បាយរីករាយ។ នៅក្នុងឱកាសនោះដែរ សិស្សានុសិស្សគ្រប់ថ្នាក់បានសម្រាកពីការសិក្សា និង បានលេងកម្សាន្ដ និងចូលរួមសប្បាយរីករាយគ្រប់ៗគ្នា។

ចុចលើរូបភាពនីមួយៗដើម្បីពង្រីករូប

នៅក្នុងឱកាសចូលឆ្នាំខ្មែរនេះ សិស្សានុសិស្សថ្នាក់ខ្មែរបានរៀបចំល្បែងប្រជាប្រិយ។ ល្បែងទាំងអស់នេះបានរៀបចំនៅតាមទីកន្លែងនានានៅក្នុងសាលាទាំងមូល។ ល្បែងប្រជាប្រិយទាំងអស់បានមានការចូលរួមពីសិស្សានុសិស្សមធ្យមសិក្សាគ្រប់ថ្នាក់ និងលោកគ្រូ អ្នកគ្រូគ្រប់ជាតិសាសន៍ចម្រុះ ដែលក្នុងនោះមាន បារាំង ខ្មែរ ចិន ជប៉ុន វៀតណាម ស្វីស។ល។ ទាំងអស់គ្នាបានរួមគ្នាទៅលេងល្បែងប្រជាប្រិយ និងស្វែងយល់ពីទំនៀមទម្លាប់នៃពិធីបុណ្យចូលឆ្នាំខ្មែរ ព្រមទាំងស្គាល់ពីវប្បធម៌ សម្លៀកបំពាក់ប្រពៃណី និងបុរាណ របាំ ជាដើម។

Read more from default Categories

Comments are closed.

%d bloggers like this: